ბავშვთა და ადრეულ ასაკში ქორწინების პრევენცია გაეროს მოსახლეობის ფონდის (UNFPA) საქმიანობის ერთ-ერთი პრიორიტეტული მიმართულებაა, რომელიც, ღრმად ფესვგადგმული სოციალური ნორმების ფონზე, მნიშვნელოვან გამოწვევად რჩება საქართველოში.
2016 წლიდან, გაეროს მოსახლეობის ფონდი, რელიგიათაშორის საბჭოსთან და ორგანიზაცია „21-ე საუკუნესთან” თანამშრომლობით და ევროკავშირის მხარდაჭერით, მართავს შეხვედრებს სხვადასხვა კონფესიების წარმომადგენლებთან, ოჯახში ძალადობის, ბავშვთა და ადრეულ ასაკში ქორწინების, ქალებისა და გოგოების მიმართ საზიანო პრაქტიკების შესახებ ცნობიერების ასამაღლებლად.
UNFPA-ის პროგრამის ანალიტიკოსის, ეთუნა ნოღაიდელის თქმით, საზიანო პრაქტიკები განსაკუთრებით მძიმე კვალს ტოვებს ქალებისა და გოგოების ცხოვრებაში, განსაკუთრებით ისეთ რეგიონებში, სადაც მსგავსი შემთხვევების მაჩვენებელი საგულისხმოა:
„რელიგიური ლიდერები თავიანთ თემში ძალიან დიდი ნდობითა და გავლენით სარგებლობენ. მათი მზაობა, რომ გაეროს მოსახლეობის ფონდთან ერთად, იმუშაონ ახალგაზრდებთან და მათ ოჯახებთან, ჩვენთვის ძალიან დამაიმედებელია“.
რელიგიურ გაერთიანებებს მნიშვნელოვანი წვლილის შეტანა შეუძლიათ იმ ძალისხმევაში, რასაც სახელმწიფო, საერთაშორისო და ადგილობრივ პარტნიორებთან ერთად ატარებს მსგავსი საზიანო პრაქტიკების აღმოსაფხვრელად.
სწორედ ამ მიზანს ემსახურებოდა ივლისში გამართული შეხვედრა მუსლიმ სასულიერი ლიდერებთან, სადაც განიხილეს ბავშვთა და ადრეულ ასაკში ქორწინების საზიანო პრაქტიკებზე რელიგიური ორგანიზაციების მხრიდან რეაგირების შესაძლო გზები ასევე მათი როლი ბავშვთა და ადრეულ ასაკში ქორწინების შემთხვევების გამოვლენის და რეფერირების პროცესში.
როგორც თბილისის ჯუმა მეჩეთის იმამი, შირხან ჩობანოვი აღნიშნავს, ადრეულ ასაკში ქორწინების სურვილის შესახებ წლების წინ გაცილებით ხშირად მიმართავდნენ. ბოლო პერიოდში კი ძალიან შემცირდა მსგავსი სურვილით მიმართვიანობა.
„ჩვენ ყოველთვის მოვუწოდებდით ახალგაზრდებს, რომ როგორც რელიგიურად, ასევე კანონის მიხედვით, ეს არ იყო მიზანშეწონილი. ჩვენ ასევე ვუხსნიდით, რომ ამ ახალგაზრდებს ბევრი სხვა გამოწვევები აქვთ, რაც მთავარია, სწავლა და, რომ შემდგომ ეფიქრათ ოჯახის შექმნაზე. ჩვენმა აქტიურმა მუშაობამ, ჩართულობამ, რეკომენდაციებმა, ინფორმაციის გაზიარებამ, შედეგი გამოიღო. ჩვენს სიტყვას აქვს გავლენა და, ეტაპობრივად, ვგრძნობთ ცვლილებას როგორც თბილისში, ასევე რეგიონებში.“
იმამებთან შეხვედრა გაიმართა პროგრამის „ევროკავშირი გენდერული თანასწორობისთვის: ერთად გენდერული სტერეოტიპებისა და გენდერული ძალადობის დასაძლევად“ (მეორე ფაზის) ფარგლებში, რომელიც ერთობლივად ხორციელდება გაეროს ქალთა ორგანიზაციის (UN Women) და გაეროს მოსახლეობის ფონდის (UNFPA) მიერ, ევროკავშირის მხარდაჭერით.
