მარიამ ბარბაქაძე სოფელ საყუნეთის საჯარო სკოლის მე-10 კლასის მოსწავლეა. მარიამისთვის, რომელსაც თანამედროვე ლიტერატურა ძალიან უყვარს, კითხვა საუკეთესო გზაა სამყაროს აღმოსაჩენად და სიახლეებზე დასაფიქრებლად.
ახალციხის მუნიციპალიტეტის სოფელ საყუნეთის საჯარო სკოლაში „თანასწორობის კუთხე“ ქალთა კვირეულის ფარგლებში გაიხსნა. გაეროს მოსახლეობის ფონდის ინიციატივით და ევროკავშირის მხარდაჭერით, სკოლის ბიბლიოთეკას 200-ზე მეტი წიგნი შეემატა, რომელთა ძირითადი თემა თანასწორობა, ტოლერანტობა და ადამიანის უფლებებია.
ძალიან მადლიერი ვარ, რომ წიგნები მოიტანეს. მართლა გულით გამიხარდა, რომ ალაგებდნენ თაროებზე და ეს წიგნები დავინახე“, ამბობს მარიამი და დასძენს, რომ უფრო ხშირად ელექტრონული წიგნების კითხვა უწევს, რაც, გარკვეულწილად, დამღლელია მისთვის. „ისე გამიხარდა, რომ თითქოს გარშემო ცხოვრება გაჩერდა და მარტო ამ წიგნებს ვხედავდი.“
თანასწორობის კუთხის გახსნაში მონაწილეობა მიიღეს გაეროს მოსახლეობის ფონდის (UNFPA) საქართველოს ოფისის ხელმძღვანელმა, ლელა ბაქრაძემ და მწერალმა და ტელეწამყვანმა დათო გორგილაძემ. მათ მოსწავლეებთან გენდერული თანასწორობის, გოგოებისა და ბიჭებისთვის თანაბარი შესაძლებლობების შექმნის და ლიტერატურის მნიშვნელობაზე ისაუბრეს.
„თანასწორობის კუთხეების“ გახსნა საქართველოს სხვადასხვა რეგიონის სკოლებსა და ბიბლიოთეკებში გაეროს მოსახლეობის ფონდის ინიციატივაა, რომელიც 2018 წლიდან, პარტნიორ ორგანიზაციებთან ერთად ხორციელდება. აღნიშნული ინიციატივა საშუალებას აძლევს მოზარდებს და ახალგაზრდებს, თანამედროვე მხატვრული ლიტერატურის საშუალებით, მეტი გაიგონ თანასწორობის იდეის შესახებ.
საყუნეთის საჯარო სკოლის „თანასწორობის კუთხე“, რომელიც უკვე მეთერთმეტეა საქართველოს მასშტაბით, გაიხსნა პროგრამა „გენდერული ნიშნით სქესის შერჩევისა და მასთან დაკავშირებული მავნე პრაქტიკების დასაძლევად სამხრეთ კავკასიაში”, რომელიც ხორციელდება გაეროს მოსახლეობის ფონდის მიერ, ევროკავშირის მხარდაჭერით.
