6 და 7 მარტს, ქალთა კვირეულის ფარგლებში, გაეროს მოსახლეობის ფონდის (UNFPA) საქართველოს ოფისმა ღონისძიებები გამართა იმერეთისა და სამცხე-ჯავახეთის რეგიონებში. ღონისძიებებაში მონაწილეობა მიიღეს გაეროს მოსახლეობის ფონდის საქართველოს ოფისის ხელმძღვანელმა ლელა ბაქრაძემ და ორგანიზაციის წარმომადგენლებმა.
6 მარტს, ჭიათურაში, მამებისა და შვილებისთვის საბავშვო წიგნის, „ლუნა და ციცინათელების პლანეტა” პრეზენტაცია გაიმართა. 7 მარტს ახალციხეში კი კიდევ ერთი საბავშვო პუბლიკაცია „იავნანა ლილისთვის“ წარუდგინეს მამებსა და შვილებს.
საბავშვო პუბლიკაციები „ლუნა და ციცინათელების პლანეტა” და „იავნანა ლილისთვის“, გაეროს მოსახლეობის ფონდის საქართველოს ოფისის ინიციატივითა და ევროკავშირის მხარდაჭერით გამოიცა “პალიტრა L”-ის მიერ.
წიგნის „ლუნა და ციცინათელების პლანეტა” ტექსტის ავტორი მწერალი დათო გორგილაძეა, ილუსტრაციები თათია ნადარეიშვილს ეკუთვნის. ხოლო, „იავნანა ლილისთვის“ მწერალმა ალექსანდრე ლორთქიფანიძემ დაწერა. მისთვის ილუსტრაციები კი სოფო კირთაძემ შექმნა.
6 მარტს ახალციხეში, დემოკრატიული ჩართულობის ცენტრში ტრენინგის ახალგაზრდები სოციალური ცვლილებებისთვის დახურვის ცერემონიაც შედგა.
7 მარტს კი გაეროს მოსახლეობის ფონდის საქართველოს ოფისის ხელმძღვანელი ლელა ბაქრაძე ადგილობრივი თვითმმართველობის წარმომადგენლებს ახალციხის მუნიციპალიტეტის საკრებულოს თავჯდომარის მოადგილეს დავით ტაბატაძესა და ახალციხის მუნიციპალიტეტის მერს ირაკლი ლაზარაშვილის შეხვდა.
სამცხე-ჯავახეთში ვიზიტის ფარგლებში, სოფელ საყუნეთის საჯარო სკოლაში გაიხსნა „თანასწორობის კუთხეც“. „თანასწორობის კუთხეების“ გახსნა საქართველოს სხვადასხვა რეგიონის სკოლებსა და ბიბლიოთეკებში გაეროს მოსახლეობის ფონდის ინიციატივაა, რომელიც 2018 წლიდან, პარტნიორ ორგანიზაციებთან ერთად ხორციელდება. „თანასწორობის კუთხე“ საშუალებას აძლევს მოზარდებს და ახალგაზრდებს, თანამედროვე მხატვრული ლიტერატურის საშუალებით, მეტი გაიგონ თანასწორობის იდეის შესახებ.
სამცხე-ჯავახეთის რეგიონში ღონისძიებები ჩატარდა პროგრამის „გენდერული ნიშნით სქესის შერჩევისა და მასთან დაკავშირებული მავნე პრაქტიკების დასაძლევად სამხრეთ კავკასიაში”, რომელიც ხორციელდება გაეროს მოსახლეობის ფონდის მიერ, ევროკავშირის მხარდაჭერით.
ხოლო იმერეთის რეგიონში ღონისძიებები ჩატარდა პროგრამის „ევროკავშირი გენდერული თანასწორობისთვის: ერთად გენდერული სტერეოტიპებისა დაგენდერული ძალადობის დასაძლევად“, ფარგლებში რომელიც ერთობლივად ხორციელდება გაეროს ქალთა ორგანიზაციის (UN Women) და გაეროს მოსახლეობის ფონდის (UNFPA) მიერ, ევროკავშირის მხარდაჭერით.
