თქვენ აქ ხართ

2018 წლის 23 სექტემბერს, გაეროს მოსახლეობის ფონდის (UNFPA) საქართველოს ოფისის, არასამთავრობო ორგანიზაცია We Care-ისა და საქართველოს ფეხბურთის ფედერაციის ინიციატივით, კამპანიის „კაცები ზრუნავენ“ ფარგლებში, დავით პეტრიაშვილის არენაზე მამებისა და შვილების საფეხბურთო ჩემპიონატი უკვე მეორედ გაიმართა.

ჩემპიონატში 16 გუნდი მონაწილეობდა.  მამებმა, რომლებიც მწვრთნელების ამპლუაში იყვნენ, თამაშზე წარმოადინეს გუნდები გოგონებისა და ბიჭების თანაბარი რაოდენობით - 8-12 წლის, მინიმუმ, ოთხი და მაქსიმუმ, ექვსი მონაწილე.

“მამების თასის” ყველა მონაწილეს სამახსოვრო პრიზები გადაეცა.  

ჩემპიონატი გაეროს მოსახლეობის ფონდის (UNFPA) საქართველოს ოფისსა და საქართველოს ფეხბურთის ფედერაციას შორის არსებული თანამშრომლობის ნაწილია. მისი მთავარი მიზანია, გასწიოს კამპანიის „კაცები ზრუნავენ“ ძირითადი იდეისა და ცხოვრების ჯანსაღი წესის პოპულარიზაცია საზოგადოებაში.

„მამების თასი“ უმნიშვნელოვანეს მიზანს ემსახურება - ეს ჩემპიონატი, რომელიც უკვე ტრადიციად იქცა, ხელს უწყობს ცხოვრების ჯანსაღი წესის პოპულარიზაციას ახალ თაობაში და აერთიანებს მამებს გენდერული თანასწორობის იდეის გარშემო. სასიხარულოა, რომ ასეთი მამების რიცხვი საქართველოში ყოველწლიურად იზრდება. „მამების თასის“ პოპულარობა მშობლებსა და ბავშვებში ნათლად გვიჩვენებს, რომ გენდერული თანასწორობა, მამაკაცების ჩართულობა შვილების აღზრდასა და საოჯახო საქმეში, ჩვენი ყოველდღიურობის განუყოფელი ნაწილი უნდა იყოს. მოხარული ვართ, რომ ამ გარდამტეხ პროცესში საქართველოს ფეხბურთის ფედერაცია აქტიურად ჩაერთო და ჩვენ უკვე საკმაოდ ნაყოფიერი თანამშრომლობა გვაკავშირებს," - აღნიშნა გაეროს მოსახლეობის ფონდის (UNFPA) საქართველოს ოფისის ხელმძღვანელმა ლელა ბაქრაძემ.

ჩემპიონატის მნიშვნელობაზე ასევე ისაუბრა საქართველოს ფეხბურთის ფედეარციის პრეზიდენტმა ლევან კობიაშვილმა: "მამების თასი“ მასობრივი ფეხბურთის კვირეულის განუყოფელ ნაწილად იქცა. წელს, უკვე მეორედ, აღნიშნულ გათამაშებას გაეროს მოსახლეობის ფონდის საქართველოს ოფისთან და ორგანიზაცია "WECARE”- თან ერთად ვატარებთ. განსაკუთრებით მიხარია, რომ მამების თასზე მოასპარეზე გუნდების რაოდენობა წინა წელთან შედარებით გაორმაგებულია. რაც უფრო მეტი გოგონა და ვაჟი ჩაერთვება გათამაშებაში, მით უფრო მეტად მოხდება ფეხბურთისა და ჯანსაღი ცხოვრების წესის პოპულარიზაცია. ამასთან, ტურნირი გამორჩეულია, რადგან გოგონებსა და ბიჭებს თანაბარ შესაძლებლობას აძლევს ისიამოვნონ თამაშით. გოგონათა ფეხბურთში ჩართვა საქართველოს ფეხბურთის ფედერაციის პრიორიტეტია და მჯერა, რომ ჩვენს ძლიერ პარტნიორებთან ერთად კიდევ ბევრი საინტერესო ინიციატივას განვახორციელებთ ამ მიმართულებით.“

კამპანია „კაცები ზრუნავენ“ ხორციელდება გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია We Care-ის მიერ, გაეროს ერთობლივი პროგრამის „გენდერული თანასწორობისთვის“ ფარგლებში, შვედეთის მთავრობის ფინანსური მხარდაჭერით. კამპანიის მიზანია წაახალისოს მამაკაცების, როგორც არამოძალადე და მზრუნველი მამების და მეუღლეების ჩართულობა ოჯახების ჯანმრთელობისა და კეთილდღეობისათვის, რათა მამაკაცებმა მეტად დაუჭირონ მხარი გენდერულ თანასწორობას და ამ გზით - საზოგადოების გაძლიერებას. მასში მონაწილეობა შეუძლია ყველა მამაკაცს, რომელიც კამპანიის იდეას იზიარებს.