27 სექტემბერს, გაეროს მუდმივი კოორდინატორი, დიდიე ტღებიუკი და გაეროს მოსახლეობის ფონდის (UNFPA) საქართველოს ოფისის ხელმძღვანელი, მარიამ ბანძელაძე, აჭარის ა/რ ჯანმრთელობისა და სოციალური დაცვის მინისტრს, ნინო ნიჟარაძეს შეხვდნენ.
შეხვედრაზე მხარეებმა განიხილეს სამომავლო თანამშრომლობის საკითხები, ასევე ისაუბრეს გაეროს ერთობლივი პროგრამის „საქართველოში COVID-19 პანდემიის უარყოფითი ზეგავლენის მინიმუმამდე შემცირება ტელემედიცინისა და ციფრული სამედიცინო ტექნოლოგიების საშუალებით“, რომლის შესახებ ურთიერთთანამშრომლობის მემორანდუმს UNFPA-იმ და სამინისტრომ გასულ წელს მოაწერეს ხელი. სწორედ აჭარაში ხორციელდება პილოტური პროექტი, რომელიც შეფასების შემდეგ დაინერგება მთელ ქვეყანაში.
მემორანდუმის თანახმად, მხარეები ითანამშრომლებენ ანტენატალური მეთვალყურეობისა და ოჯახის დაგეგმვის მიმართულებით, ჯანმრთელობის მომსახურებების დისტანციურად მიწოდების ინოვაციური მიდგომების: ტელემედიცინისა და ტელემეთვალყურეობის სერვისების დასანერგად აჭარის ავტონომიურ რესპუბლიკაში.
პროგრამა ერთობლივად ხორციელდება ჯანმრთელობის მსოფლიო ორგანიზაციის, გაეროს მოსახლეობის ფონდის, გაეროს ბავშვთა ფონდისა და გაეროს პროექტების მომსახურების ოფისის მიერ, საქართველოს ოკუპირებულ ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან თანამშრომლობით და ევროკავშირის ფინანსური მხარდაჭერით.
