გაეროს მოსახლეობის ფონდის საქართველოს ოფისის #UNFPA ინიციატივით და შვედეთის მთავრობის მხარდაჭერით, გაეროს ერთობლივი პროგრამის „გენდერული თანასწორობისთვის“ ფარგლებში, გოგოების საერთაშორისო დღესთან დაკავშირებით, ფოტოგრაფ დინა ოგანოვას გამოფენა „გისურვებ“ გაიმართა.
11 ოქტომბერი გოგოების საერთაშორისო დღეა. ამ დღის აღნიშვნით, ხაზს ვუსვამთ გოგოების უფლებებს და იმ უნიკალურ გამოწვევებს, რომელთა წინაშეც ისინი დგანან, მსოფლიო მასშტაბით, მათ შორის, საქართველოშიც.
მოზარდ გოგოებს აქვთ უფლება, იცხოვრონ ჯანსაღ, უსაფრთხო გარემოში და ჰქონდეთ განათლების მიღების შესაძლებლობა, არა მხოლოდ განვითარების ამ მნიშვნელოვან ეტაპზე, არამედ მომავალშიც, როდესაც ისინი ზრდასრულ ქალებად ჩამოყალიბდებიან. თუმცა, ბავშვობის ასაკში ქორწინების საზიანო პრაქტიკა, რომელიც ადამიანის უფლებების უხეში დარღვევაა, კვლავ გამოწვევად რჩება საქართველოში - საფრთხეს უქმნის გოგოების სიცოცხლესა და ჯანმრთელობას და ზღუდავს მათ მომავალ პერსპექტივებს.
გამოფენა 10 ოქტომბერს, თბილისში, ზურაბ წერეთლის თანამედროვე ხელოვნების მუზეუმში გაიმართა. გამოფენაზე წარმოდგენილი იყო 20 განსხვავებული ასაკის, პროფესიისა და ინტერესის მშობლის ფოტოისტორია, რომელსაც გოგო შვილი/შვილიშვილი ჰყავს. ყველას აერთიანებს სურვილი, ხმა აიმაღლონ ბავშვობის ასაკში ქორწინების წინააღმდეგ და დაგმონ ეს საზიანო პრაქტიკა, რომელიც გოგოებს უტოვებს ტრავმას, ართმევს ბავშვობას და შესაძლებლობას, ისწავლონ, ითამაშონ, იოცნებონ და გაეცნონ სამყაროს.
