2024 წლის 14 ნოემბრიდან 19 დეკემბრის ჩათვლით, საქართველოს სტატისტიკის ეროვნული სამსახური (საქსტატი) საქართველოს მოსახლეობის და სასოფლო-სამეურნეო აღწერას იწყებს.
საქსტატს აღწერის პროცესის წარმართვასა და მონაცემების ანალიზში ტექნიკურ დახმარებას გაუწევს გაეროს მოსახლოების ფონდი (UNFPA), რომელიც 2002 წლიდან უჭერს მხარს საყოველთაო აღწერის ჩატარებას საქართველოში.
საქსტატის აღმასრულებელმა დირექტორმა, გოგიტა თოდრაძემ დღეს გამართულ ბრიფინგზე აღნიშნა, რომ აღწერის შედეგად მიღებული იქნება უახლესი ინფორმაცია მოსახლეობის რიცხოვნობის, მათი სქესობრივ-ასაკობრივი სტრუქტურის, დასაქმების, განათლების, ჯანმრთელობის მდგომარეობის, საარსებო წყაროებისა და საცხოვრისების შესახებ. ამასთან ერთად, სასოფლო–სამეურნეო კომპონენტის მეშვეობით, შეგროვდება მონაცემები შინამეურნეობების სასოფლო-სამეურნეო აქტივობის შესახებ.
გაეროს მოსახლოების ფონდის (UNFPA) საქართველოს ოფისის ხელმძღვანელის, მარიამ ბანძელაძის თქმით, „სწორედ მონაცემთა ხარისხიანად შეგროვება და ანალიზი უნდა წარმოადგენდეს ყველა პოლიტიკის საფუძველს.“
„ჩვენი მიდგომა ეფუძნება 1994 წლის მოსახლეობისა და განვითარების შესახებ საერთაშორისო კონფერენციის ხედვას, რომელიც ხაზს უსვამს კავშირს მოსახლეობას, განვითარებასა და ადამიანების ინდივიდუალურ კეთილდღეობას შორის, და ადამიანის უფლებებს განვითარების ცენტრში აყენებს, რაც დემოგრაფიულ მდგრადობაზე საუბრისას განსაკუთრებულ მნიშვნელობას იძენს. ამ ხედვის კვალდაკვალ, ჩვენ განვაგრძობთ მჭიდრო თანამშრომლობას საქსტატთან და ტექნიკური დახმარების გაწევას როგორც აღწერის პროცესის წარმართვის, ასევე მონაცემთა ანალიზის მიმართულებით“ - აღნიშნავს მარიამ ბანძელაძე.
აღწერის წინასწარი შედეგები გამოქვეყნდება 2025 წლის ივნისში, ხოლო საბოლოო - 2026 წლის ივნისში.
