გაეროს მოსახლეობის საქართველოს ოფისმა სამედიცინო პერსონალისთვის 3-5 დეკემბერს გურიასა და იმერეთში ჩაატარა ტრენინგების სერია ანტენატალურ მოვლაში კაცების ჩართულობის გასაუმჯობესებლად.
3 დეკემბერს ოზურგეთში, 4 დეკემბერს ქუთაისში, 5 დეკემბერს კი საჩხერეში სამედიცინო სამედიცინო სფეროს წარმომადგენლებს რეგიონებში შეხვდნენ მედიცინის დოქტორი, პლატონ მაჭავარიანი, მეან-გინეკოლოგები მაკა ჩიქოვანი და სოფიო ბოჯგუა.
![](https://georgia.unfpa.org/sites/default/files/dsc03385.jpg)
ჯანდაცვის სექტორი მნიშვნელოვანი რგოლია ოჯახზე მზრუნველობაში მამების ადრეულ ეტაპზე ჩართვის ხელშესაწყობად. თუმცა, როგორც წესი, დედათა და ბავშვთა ჯანმრთელობის სერვისების მიმწოდებლები, უმთავრესად, დედებსა და ბავშვებზე არიან ორიენტირებულები და არც თუ ისე ხშირად ამახვილებენ ყურადღებას პროცესებში კაცის - როგორც მშობლის, ქალის პარტნიორისა და დედასა და ბავშვზე ზრუნვაზე პასუხისმგებელი პირის - ჩართვაზე.
სამედიცინო პერსონალის მოსამზადებელი ტრენინგ-მოდული განკუთვნილია ანტენატალურ მეთვალყურეობაში ჩართული ექიმებისათვის და ემსახურება ორსულობისა და მშობიარობის პროცესებში კაცების უფრო აქტიურად ჩართვას, რაც ხელს შეუწყობს არა მხოლოდ ქალებისა და ბავშვების ჯანმრთელობისა და კეთილდღეობის, არამედ თავად კაცების ჯანმრთელობისა და კეთილდღეობის გაუმჯობესებას.
![](https://georgia.unfpa.org/sites/default/files/dzne4917.jpg)
მოდული შეიქმნა პროგრამის: „ევროკავშირი გენდერული თანასწორობისათვის: ერთად გენდერული სტერეოტიპებისა და გენდერული ნიშნით ძალადობის დასაძლევად“ ფარგლებში, რომელიც დაფინანსებულია ევროკავშირის მიერ და ხორციელდება გაეროს ქალთა ორგანიზაციისა (UN Women) და გაეროს მოსახლეობის ფონდის (UNFPA) მიერ.