10 ოქტომბერს, ადიგენის მუნიციპალიტეტის სოფელ ბოლაჯურში, გაეროს მოსახლეობის ფონდის (UNFPA) ინიციატივით და ევროკავშირის (EU) მხარდაჭერით, „თანასწორობის კუთხე“ გაიხსნა და ბოლაჯურის საჯაროს სკოლას 200-ზე მეტი წიგნი შეემატა თანასწორობის, ქალებისა და გოგოების გაძლიერების, ტოლერანტობის და ადამიანის უფლებების შესახებ.
„თანასწორობის კუთხის“ გახსნაში მონაწილეობა მიიღო გაეროს მოსახლეობის ფონდის (UNFPA) საქართველოს ოფისის ხელმძღვანელმა ლელა ბაქრაძემ. ამავდროულად, გაიმართა მოსწავლეების შეხვედრა ცნობილ ქართველ ავტორთან, ნესტან (ნენე) კვინიკაძესთან, რომელმაც ახალგაზრდებთან გენდერული თანასწორობის, გოგოებისა და ბიჭებისთვის თანაბარი შესაძლებლობების შექმნისა და ლიტერატურის მნიშვნელობაზე ისაუბრა.
„თანასწორობის კუთხეების“ გახსნა საქართველოს სხვადასხვა რეგიონში გაეროს მოსახლეობის ფონდის ინიციატივაა, რომელიც 2018 წლიდან, პარტნიორ ორგანიზაციებთან ერთად ხორციელდება.
UNFPA-ის რიგით მეოცე „თანასწორობის კუთხე“ ბოლაჯურის საჯარო სკოლაში გაიხსნა პროგრამის „გენდერული ნიშნით სქესის შერჩევისა და მასთან დაკავშირებული მავნე პრაქტიკების დასაძლევად სამხრეთ კავკასიაში” ფარგლებში, ხორციელდება გაეროს მოსახლეობის ფონდის (UNFPA) მიერ, ევროკავშირის მხარდაჭერით.
